Հայաստանում առաջին անգամ ջրի վրա կկառուցվի փորձնական լողացող արևային ֆոտովոլտային կայան: Այն իր տեսակի մեջ առաջինն է լինելու նաև տարածաշրջանում: Ինչպես տեղեկացնում է Հայաստանի վերականգնվող էներգետիկայի և էներգախնայողության հիմնադրամը, 150 կՎտ հզորությամբ կայանի կառուցման համար հայ և ֆրանսիացի մասնագետները դիտարկում են 3 տարբերակ՝ Երևանյան լիճը, Ապարանի և Ազատի ջրամբարները: Կայանի արտադրությունը կարող է կազմել շուրջ 250 հազար կՎտժ/տարի:
Կայանի կառուցումը նախատեսված է «Հայաստանում առաջին Արևային լողացող կայանի զարգացման ծրագրի» շրջանակներում, որը համատեղ իրականացնում են Հայաստանի վերականգնվող էներգետիկայի և էներգախնայողության հիմնադրամը և ֆրանսիական Տրանսէներգիա (TRANSENERGIE) ընկերությունը: Ծրագիրը մեկնարկել է սույն թվականի մարտի 1-ին:
Հիմնադրամն իր ֆեյսբուքյան էջում հրապարակել է գերմանական «Baywa» ընկերության կողմից Նիդեռլանդներում գտնվող 27,4 ՄՎտ հզորությամբ «Bomhofsplas» լողացող արևային էլեկտրակայանի շրջակա միջավայրի վրա ազդեցության ուսումնասիրության նախնական արդյունքների մասին տեղեկատվություն, որի համաձայն՝ որևէ նշանակալի բացասական ազդեցություն լճի բուսական և կենդանական աշխարհի վրա չի արձանագրվել:
«Հայաստանում առաջին Արևային լողացող կայանի զարգացման ծրագրի» շրջանակներում Երևանյան լճի տարածքում աշխատանքներ իրականացնելու համար Երևանի քաղաքապետ Հայկ Մարությանը և Հայաստանի վերականգնվող էներգետիկայի և էներգախնայողության հիմնադրամի տնօրեն Կարեն Ասատրյանն արդեն իսկ համագործակցության հուշագիր են ստորագրել:
Ծրագրով նախատեսվում է նաև Երևանի քաղաքապետարանի կողմից հատկորոշված մանկապարտեզներից մեկում իրականացնել վերականգնվող էներգետիկայի ծրագիր՝ տեղադրելով էլեկտրաէներգիայի արտադրության ֆոտովոլտային կայան:
Լուսանկարը՝ www.r2e2.am
Հուլիս 01, 2021 at 17:43