ԷկոԼուր
2012 թ-ին «Հիդրոկորպորացիա» ՓԲԸ-ն Սեւանա լիճ թափվող ամենամեծ գետի` Արգիճիի վրա կառուցեց «Արգիճի» փոքր ՀԷԿ-ը ժամկետնանց փաստաթղթերով: ՓՀԷԿ-ի նախագծի շրջակա միջավայրի վրա ազդեցության գնահատումն ավարտին է հասցվել 2006թ. հուլիսի 7-ին: «Շրջակա միջավայրի վրա ազդեցության փորձաքննության մասին» ՀՀ օրենքի 11-րդ հոդվածի 4-րդ կետի համաձայն` փորձաքննական եզրակացությունը կորցնում է ուժը, եթե նախատեսվող գործունեության իրականացումը չի սկսվում փորձաքննական եզրակացության տրվելուց մեկ տարվա ընթացքում, որից հետո պահանջվում է նոր փորձաքննական եզրակացություն: 2012թ-ին ՓՀԷԿ-ը կառուցվեց հին նախագծով:
ԷկոԼուրի լրագրողները 2013թ. վերջին Գեղարքունիքի մարզի Վերին Գետաշեն, Ներքին Գետաշեն եւ Մադինա համայնքներում անցկացրեցին սոցիալական հարցումներ` պարզելու բնակիչների կարծիքը «Արգիճի» ՓՀԷԿ-ի վերաբերյալ:
16 հարցվածներից բոլորը ասացին, որ ՓՀԷԿ-ի կառուցումից հետո իրենց կյանքի որակը չի լավացել, իսկ 6-ը նշեց, որ վատացել է:
14 հոգի ասաց, որ ՓՀԷԿ-ի պատճառով ձկան պաշարները գետում արդեն իսկ նվազել են:
10 հոգի համոզված են, որ ՓՀԷԿ-ի ազդեցությամբ Արգիճի գետի սանիտարական վիճակը գնալով կփոխվի եւ կվատանա:
13 հոգի նկատել է, որ ՓՀԷԿ-ն ազդում է իրենց ջրամատակարարման վրա:
Այն հարցին, թե ի՞նչ խոստումներ են տվել ՓՀԷԿ-ը կառուցողները, 13 հոգի պատասխանեց, որ ոչ մի խոստում չեն տվել: 3 հոգի նշեց, որ խոստացել են ճանապարհները բարեկարգել, բայց չեն արել:
ՓՀԷԿ-ին դեմ արտահայտվեց 9 բնակիչ, կողմ` 2, եւ 5 հոգի հրաժարվեց պատասխանել:
Սույն նյութը հնարավոր է դարձել Բաց հասարակության հիմնադրամներ - Հայաստանի ամբողջական ֆինանսական օժանդակության շնորհիվ՝ քաղաքականության կրթաթոշակներ նախաձեռնության ծրագրի շրջանակներում, դրամաշնորհ N 18571.։ Հոդվածում տեղ գտած վերլուծություններն արտահայտում են հեղինակի տեսակետը և կարող են չհամընկնել Բաց հասարակության հիմնադրամներ - Հայաստանի դիրքորոշումների ու տեսակետների հետ։
Ապրիլ 25, 2014 at 16:52