News.am
Գյումրիում բնական գազի սպառման ծավալները նվազել են մոտ 25 տոկոսով: Գազի սակագինը բարձր է, իսկ բաժանորդներն հատկապես ձմռան ամիսներին չեն կարողանում վճարումներ անել օգտագործած գազի դիմաց:
«Անցել եմ կրկին փայտի օգտագործման: Շատ գոհ եմ, ավելի ձեռնտու է, գազ օգտագործում ենք միայն սուրճ եփելու համար»,- ասում է գյումրեցի Գեւորգ Սիրունյանը:
Գազի սակագնի բարձրացման հետեւանքով նույնիսկ գազի կաթսաներ ունեցող ընտանիքներն են սկսել ձմռանը փայտ վառել։ Դա նշանակում է, որ հաջորդ ձմռանը փայտի պահանջարկը դարձյալ մեծ է լինելու։ Այս փաստով անհանգստացած են բնապահպանները: Ծառահատումներն ավելացել են գրեթե ամենուր:
Գյումրիի «Օրհուս» բնապահպանական կենտրոնի համակարգողն ասում է, թե բնությունը տուժում է ու դա առավել կարտահայտվի ամռանը, երբ կանաչ տարածքների բացակայությունը ակնհայտ կդառնա:
«Պետք է պետական մարմինները եւ հասարակությունը ուշադրություն դարձնեն այս խնդրին»,-գտնում է Գյումրիի «Օրհուս» բնապահպանական կենտրոնի համակարգողԳեւորգ Պետրոսյանը: Բնապահպանները ՀՀ կառավարությանն առաջարկել են այս տարի աշնանը մշակել «Ձմեռ» ծրագիր եւ դրա շրջանակներում կանխարգելել ծառահատումները։
Նշենք որ այսօր Գյումրիի տարբեր վաճառակետերում փայտի 1 խմ-ն մինչեւ 18 հազար դրամ էր, իսկ մեկ կապոց փայտը մինչեւ 150 դրամ:
Փետրվար 21, 2011