ԷկոԼուր
Երևանի քաղաքապետարանը մերժեց Աջափնյակ վարչական շրջանում «Սենթրալ Իսթեյթ» ՍՊԸ-ի կողմից ներկայացված Սպանդարյանի տուֆի և բազալտի հանքավայրի շահագործման նախագիծը: Այս մասին հայտնում է Երևանի ավագանու «Իմ քայլը» խմբակցության անդամ Գայանե Մելքոմյանը ֆեյսբուքյան իր էջում:
«Հիմնվելով հանրային լսումների արդյունքների վրա` Երևանի քաղաքապետը որոշում է կայացրել Աջափնյակում տուֆի և բազալտի նոր հանքի շահագործմանը համաձայնություն չտալու մասին: Ըստ այդմ` այսօր հայտատուին ուղարկվել է համայնքի մերժումը», - գրել է Գայանե Մելքոմյանը:
Հիշեցնենք, որ ս. թ. հունվարի 22-ին անցկացված հանրային լսումների ժամանակ Աջափնյակ վարչական շրջանի բնակիչներն ու բնապահպանները դեմ էին արտահայտվել Աջափնյակում նոր հանքավայրի շահագործման նախագծին: Նրանք նշել էին, որ Երևանում նոր հանքավայրի շահագործման փաստը մտահոգիչ է, քանի որ քաղաքում հանքավայրերի գործունեության հետևանքով առաջացած փոշու ծավալները շատ մեծ են:
2019 թ. հոկտեմբերի 1-ի դրությամբ Երևան քաղաքում ոչ մետաղական օգտակար հանածոների արդյունահանման նպատակով տրամադրված է թվով 18 ընդերքօգտագործման թույլտվություն: ՀՀ Տարածքային կառավարման և ենթակառուցվածքների նախարարության կայքի համաձայն՝ Երևանում ընդերքօգտագործման թույլտվություն ստացած ընկերությունները 14-ն են:
Հունվար 31, 2020 at 15:57