ԷկոԼուր
Սյունիքի մարզի Կարճևան համայնքի բնակիչները նամակով դիմել են ՀՀ բնապահպանության նախարար Էրիկ Գրիգորյանին՝ պահանջով մասնագետ ուղարկել համայնք՝ «Ագարակի պղնձամոլիբդենային կոմբինատ» ՓԲԸ-ի տարածքից դեպի կարճևանցիների այգիներ հոսող ջրից նմուշառում վերցնելու և այն փորձաքննության ենթարկելու համար: Այս մասին ԷկոԼուրին տեղեկացրեց Կարճևան համայնքի բնակիչ Սիմոն Խաչիկյանը:
Նախարարին ուղղված նամակում մասնավորապես գրված է.
«Պարոն Գրիգորյան, խնդրում ենք Ձեր նախարարության միջամտությունը, որպես վերահսկող մարմին, համապատասխան մասնագետ ուղարկելու, հարցին վերջնական ու հիմնավոր լուծում տալու համար»:
Հիշեցնենք, որ այս տարվա փետրվարին կարճևանցիների բողոքի հիման վրա Բնապահպանության և ընդերքի տեսչական մարմինը վարչական վարույթ էր հարուցել «Ագարակի պղնձամոլիբդենային կոմբինատ» ՓԲԸ-ի գլխավոր տնօրեն Անդրեյ Սինյակովի նկատմամբ և պարզել, որ ընկերության հանքայինտարածքներից դուրս են գալիս գրունտային ջրեր, պոմպերի միջոցով կատարվում է ջրահեռացում բետոնե ջրատարով, այնուհետև պլաստմասե խողովակաշարով:Պլաստմասե խողովակաշարից անցք է բացվել, որպեսզի համայնքի բնակիչները ոռոգեն իրենց հողամասերը: Սակայն նշված բնակիչների հողամասերը ողովել ենհանքային գրունտային ջրերով, ինչը խոչընդոտ է հանդիսանում հողի նպատակային օգտագործմանը: Հիմք ընդունելով Ջրային օրենսգրքի 117-րդ հոդվածը`տեսչական մարմինը Ագարակի կոմբինատից պահանջել էր վնաս հասցնող գործունեության անհապաղ դադարեցում՝ մինչև սույն օրենսգրքով սահմանված կարգովխնդրի վերացումը՝ նշելով գործունեությունը չդադարեցնելու դեպքում տուգանքների մասին:
Ինչպես ԷկոԼուրին հայտնեցին Կարճևանի բնակիչները, Տեսչական մարմնի պահանջը կատարվել է մի քանի օր: Ապրիլի 4-ին ՀՀ բնապահպանության և ընդերքի տեսչության աշխատակիցը բնակիչների զանգի հիման վրա եկել է, նկարել կոմբինատից դուրս թափվող ջուրն ու խոստացել խոսել կոմբինատի տնօրինության հետ՝ ջրի հոսքը դադարեցնելու պահանջով:
«Հիմա դադարեցված է ջրի հոսքը: Իրենք գիտեն՝ երբ բաց թողնեն: Կոմբինատի թունելի մոտ ջրամբար ունեն: Կեղտոտ, ավել ջրերը բաց են թողնում, թափվում է այդտեղ, տակից, մոտ 100 մետր լայնությամբ ակունք է դուրս գալիս: Բայց այդ ջուրը մեզ պետք չէ, որովհետև մենք չգիտենք` դրա մեջ ինչ կա: Նախորդ տարի ես իմ 250 ծառից պտուղը լրիվ փչացած եմ քաղել, սնկային հիվանդություն է կպնում, արմատները փտում են, ո՞նց կաճի ծառը: Չէ մեզ մասնագետ է պետք»,- ասաց Կարճևանի բնակիչ Ռուբեն Մկրտչյանը:
Ապրիլ 11, 2019 at 14:50