Աստղաձորցիները դիմել են դատարան՝ ջրի նկատմամբ խախտված իրավունքները վերականգնելու պահանջով

Աստղաձորցիները դիմել են  դատարան՝ ջրի նկատմամբ խախտված իրավունքները վերականգնելու պահանջով

ԷկոԼուր

Աստղաձոր համայնքի բնակիչները դիմել են դատարան իրենց՝ ջրի նկատմամբ խախտված իրավունքները վերականգնելու պահանջով:

Գեղարքունիքի մարզի Աստղաձոր համայնքի բնակիչները զրկվել են իրենց խմելու և ոռոգման ջրի հիմնական աղբյուրից՝ Աստղաձոր գետից: Դեպի համայնք մտնող գետի հունը գրեթե ցամաքել է, ջուրն ամբողջությամբ տեղափոխվել հարևան Զոլաքար համայնք «Համայնքների գյուղատնեսական ռեսուրսների կառավարման և մրցունակության» և «Ենթակառուցվածքների և գյուղական ֆինանսավորման աջակցության» ծրագրերի իրականացման արդյունքում: 2016 թ. Զոլաքար համայնքին տրվել է ջրօգտագործման թույլտվություն՝ Զոլաքար համայնքի վարչական տարածքում գտնվող «Գռան» և «Մեծ ձորի թմբան տակ» կոչվող բնական 4 աղբյուրներից 23.1 լ/վրկ ջուր օգտագործելու համար:

Խնդրի կարգավորման և ջրի նկատմամբ իրենց իրավունքների վերականգնման նպատակով Աստղաձորի մի խումբ բնակիչներ 2018 թ. հոկտեմբերի 14-ին նամակով դիմել էին ՀՀ գլխավոր դատախազ Արթուր Դավթյանին՝ պահանջելով վերականգնել ջրի նկատմամբ իրենց խախտված իրավունքները, քննություն իրականացնել, բացահայտել բոլոր անօրինակություններն ու չարաշահումները: «Գործի մեջ կային քրեական տարրեր՝ կոռուպցիա, օրենքի խախտում»,- ԷկոԼուրի հետ զրույցում նշեց Աստղաձորի բնակիչ, գործով բողոքագիր Վարդան Գրիգորյանը:

Դատախազին դիմելուց հետո ՀՀ ոստիկանության Մարտունու բաժնում նյութեր էին նախապատրաստվել, որոնք ոստիկանության եզրակացությամբ թողնվել էին անհետևանք: Աստղաձորցիներն այս տարվա հունիսին ևս մեկ անգամ դիմել են ՀՀ գլխավոր դատախազ Արթուր Դավթյանին. «2019 թ. հունիսին դիմել ենք դատախազություն: Մարտունու բաժնում կրկին նութեր են նախապատրաստվել՝ դրան կցելով ոստիկանության նախկին եզրակացությունը: Հունիսի 9-ին տեսուչ Ռ. Մուշեղյանի կողմից կրկին մերժվել է քրեական գործի հարուցումը՝ հանցակազմի բացակայության հիմքով: Հունիսի 21-ին Մուշեղյանի որոշման դեմ բողոքարկել ենք Գեղարքունիքի մարզի դատախազ Ռաֆայել Երիցյանին: Դատախազ Ռաֆայել Երիցյանը 2019 թ. հուլիսի 5-ին մերժել է մեր բողոքը, որից հետո սահմանված կարգով մեկ ամսվա ընթացքում՝ օգոստոսի 10-ին, կրկին բողոքարկել ենք դատարան: Երիցյանը որոշումը կայացրել էր հուլիսի 5-ին՝ ՀՀ Սահմանադրության օրը, որը ոչ աշխատանքային օր է: Այդ որոշումն անօրինական է կայացվել: Վերջին միջնորդությամբ բողոքարկել ենք դատարան նաև տեսուչ Ռ. Մուշեղյանի որոշումը՝ վերանայելու պահանջով: Բողոքարկել ենք, որպեսզի քրեական գործ հարուցվի: Գտնում ենք, որ այստեղ կան հանցագործության հատկանիշներ»,- ասաց Վարդան Գրիգորյանը:

Վերջին բողոքարկումից հետո սույն գործով առաջին դատական նիստը նշանակվել է օգոստոսի 23-ին, ինչի մասին ծանուցագիրն աստղաձորցիները ստացել են 3 օր անց՝ օգոստոսի 26-ին: Բնականաբար դատական նիստը չէր կայացել: Վարդան Գրիգորյանի հետ միասին այս գործով որպես բողոքագիր են հանդես գալիս Աստղաձորի ևս 4 բնակիչ՝ Արամայիս Ասատրյանը, Սուրիկ Պետրոսյանը, Վազգեն Մինասյանը և Վարդգես Սեթրակյանը:

Սույն թվականի սեպտեմբերի 4-ին Գեղարքունիքի մարզի ընդհանուր իրավասության առաջին ատյանի դատարանի Սևանի նստավայրում պետք է քննության առնվեր Աստղաձոր համայնքի բնակիչների բողոքը ՀՀ Գեղարքունիքի մարզի դատախազի՝ 2019 թ. հուլիսի 5-ի որոշման դեմ և ՀՀ ոստիկանության Մարտունու բաժնի հետաքննության խմբի տեսուչ Ռ. Մուշեղյանի՝ 2019 թ. հունիսի 9-ին կայացրած քրեական գործ հարուցելը մերժելու մասին որոշումը վերացնելու վերաբերյալ: Նախագահող դատավոր Դավիթ Սարգսյանը հայտնեց, որ գործին առնչվող նյութերը դեռևս իր ձեռքի տակ չեն, իսկ գործով հետաքննիչը չի ներկայացել դատական նիստին: Սրա վերաբերյալ Վարդան Գրիգորյանը միջնորդությամբ հանդես եկավ, նշելով. «Քննարկվում է որոշման օրինականության մասին: Օրինականությունը հաստատել միանշանակ կարող են նյութերը: Որոշումը պետք է բխի գործով ձեռք բերված նյութերով: Արդեն երկրորդ դատական նիստն է տեղի ունենում, բայց նյութերը դեռևս չկան: Հնարավոր չէ առանց այդ նյութերի դատական նիստ անցկացնել»: Սրա հետ կապված դատավոր Սարգսյանը նշեց, որ դատական նիստը անհրաժեշտ է հետաձգել: Մինչ դատական նիստի հետաձգումը Վարդան Գրիգորյանը նաև ասաց, որ հուլիսի 5-ի որոշումը կայացրել է դատախազ Ռ.Երիցյանը և գործի ճշգրիտ քննության համար անհրաժեշտ է նրա ներկայությունը: Գրիգորյանը միաժամանակ հավելեց, որ ներկա պիտի լինի նաև ՀՀ ոստիկանության Մարտունու բաժնի տեսուչ Ռ. Մուշեղյանը. «Ներկայիս լիազորված դատախազ Արսեն Սախոյանի համոզմունքը երբեք չի կարող համընկնել Երիցյանի համոզմունքների հետ: Այդ պատճառով խնդրում եմ, որ դատական նիստերին ներկա լինի Ռ.Երիցյանը և պարզաբանի, թե որն է իր կողմից նման որոշում կայացնելու պատճառը: Բացի այդ, դատարանի դերակատարությունը կայանում է կայացրած որոշումների օրինականությունը ստուգելու մեջ: Խնդիրը գնում է նաև ոստիկանության տեսուչ Մուշեղյանի կայացրած որոշման մասին: Այդ իսկ պատճառով խիստ անհրաժեշտ է, որ ներկա լինի նաև Ռ. Մուշեղյանը»,- ասաց Գրիգորյանը:

Հաջորդ դատական նիստը կկայանա սեպտեմբերի 19-ին` ժամը 14:00-ին:

17:37 Սեպտեմբեր 05, 2019


էկոԱհազանգ

Թեժ կետեր


Մարզեր


Բաժանորդագրում

Subscribe to receive our latest news