Հայանիստում ստորագրահավաք են անում բնակիչների ջրի նկատմամբ խախտված իրավունքը վերականգնելու համար

Հայանիստում ստորագրահավաք են անում բնակիչների ջրի նկատմամբ խախտված իրավունքը վերականգնելու համար

ԷկոԼուր

ՀՀ Արարատի մարզի Հայանիստ համայնքի բնակիչները, ովքեր ունեն ոռոգման և խմելու ջրի մեծ խնդիր, ստորագրահավաք են սկսել, որպեսզի նամակով դիմեն ՀՀ կառավարությանը՝ ջրի նկատմամբ իրենց խախտված իրավունքը վերականգնելու պահանջով:

Նամակում մասնավորապես նշված է.

«Հարգելի պարոն վարչապետ, կառավարության հարգելի անդամներ,

մենք՝ Հայանիստ համայնքի բնակիչներս, դիմում ենք ջրի նկատմամբ մեր իրավունքների վերականգնման համար: Ոռոգման ցանցի բացակայության պատճառով մշակվում են մեր վարելահողերի ընդամենը 20 տոկոսը։ Համայնքում հողագործությամբ զբաղվելու անհեռանկարայնությունը վտանգում է գյուղատնտեսության այդ ճյուղի զարգացումը։

Համայնքի հիմնախնդիրների մեջ կարևորվում է ոռոգման ջրի հիմնախնդիրը։ Ոռոգման ջրի ցանցի վիճակն անմխիթար է։ Տեղադրված չեն ոռոգման ցանցի կիսախողովակները։ Ստեղծված իրավիճակի պատճառը վերջին 10-15 տարիներին Արարատյան հարթավայրի ստորերկրյա արտեզյան ջրերի պաշարների անխնա օգտագործումն է: Ներկայումս 2046 բնակիչներիս համար ստեղծվել է սոցիալական և էկոլոգիական առումով աղետալի վիճակ: Մենք զրկվել ենք մեր հիմնարար՝ ջրի մատչելիության իրավունքից:

Համայնքի 2017-2021թթ. սոցիալ-տնտեսական զարգացման ծրագրով նախատեսել ենք ոռոգման ցանցերի կիսախողովակների տեղադրում 10,0 մլն․դրամ նախագծային արժեքով և խմելու ջրագծերի վերանորոգում՝ 20,0 մլն. դրամ նախագծային արժեքով։ Վերոնշյալ ծրագրային նախատեսումներն առանց արտաքին օժանդակության անհնար է իրականացնել՝ հաշվի առնելով համայնքի եկամուտների սուղ հնարավորությունները։

Ոռոգման ջրի խնդրի հետ միաժամանակ համայնքի Գետաշեն թաղամասի 171 տնտեսություն արդեն 30 տարի ունի խմելու ջրի լուրջ խնդիր: Թաղամասի բնակիչները ջուրը վերցրել են մոտակա արտեզյան հորից` առանց ստուգելու այդ ջրի որակը և ազդեցությունը մարդու առողջության վրա: 2012թ-ին «Save the children» կազմակերպության աջակցությամբ Գետաշեն թաղամասի համար կառուցվել է 2.8 կմ երկարությամբ ջրագիծ` Արմավիրի մարզի Ոսկեհատի ջրամբարից: Մի քանի տարի անց ծորակների անսարքության պատճառով «Հայջրմուղկոյուղի» ՓԲԸ-ի հետ Գետաշեն թաղամասի ջրամատակարարման վերաբերյալ կնքված պայմանագրի գործողությունը կասեցվել է մինչև այնտեղ ներքին ցանցի կառուցումը:

2018թ-ին ՀՀ կառավարության աջակցությամբ Գետաշեն թաղամասում կառուցվել է ներքին ցանց՝ 10,5 միլիոն դրամ արժողությամբ: Սակայն «Վեոլիա Ջուր» ՓԲԸ-ն հրաժարվում է սպասարկել թաղամասում կառուցված ջրի ներքին ցանցը: Սույն թվականի մարտ ամսին, բնակիչներիս բողոքի ակցիայից հետո, «Վեոլիա Ջուր» ՓԲԸ-ն համաձայնվել է ապահովել Գետաշեն թաղամասի ջրամատակարարումը, սակայն պայմանավորվածությունը չի պահպանվել նրա կողմից, և ներկայումս թաղամասը մնացել է առանց խմելու ջրի։ «Վեոլիա ջուր» ՓԲԸ-ն չի հանձնառում «Հայջրմուղկոյուղի» ՓԲԸ–ի իրավահաջորդությունը և հրաժարվում է Գետաշեն թաղամասի ջրամատակարարման նախկին պայմանագրի վերակնքման պարտավորությունից։ Ստացվում է, որ թաղամասի անխափան ջրամատակարարումը կապված է միայն ընկերության բարի կամքի դրսևորումից և չունի իրավաբանական ձևակերպում։

Դիմում ենք ՀՀ կառավարության և պետության աջակցությանը համայնքի ջրի խնդիրների լուծման համար՝ պետական պահուստային ֆոնդից հատկացումների, միջազգային դոնոր կազմակերպությունների կողմից ֆինանսավորվող ծրագրերում ներգրավման և օրենքով չարգելվող այլ աղբյուրներից հատկացումների տեսքով։ Միաժամանակ, խնդրում ենք կառավարությանը, որպես «Վեոլիա Ջուր» ՓԲԸ-ի վարձակալական պայմանագրի կողմի, հանձնարարարել ընկերությանը, Արարատի մարզի Հայանիստ համայնքի Գետաշեն թաղամասի խմելու ջրի համակարգի սպասարկման պայմանագրի կնքման վերաբերյալ:

Միաժամանակ խնդրում ենք Ձեր հանձնարարականը ՀՀ կառավարության առողջապահական և աշխատանքի տեսչական մարմնին՝ կատարելու համայնքում մատակարարվող խմելու ջրի որակի ուսումնասիրություն և արդյունքների մասին տեղյակ պահել համայնքի բնակիչներիս»:

Սույն  նյութը պատրաստվել է «Պաշտպանիր ջրի նկատմամբ քո իրավունքը» ծրագրի շրջանակներում Ամերիկայի ժողովրդի աջակցությամբ` ԱՄՆ-ի Միջազգային զարգացման գործակալության միջոցով, որի ընթացքում արտահայտված տեսակետները կամ ներկայացված նյութերի բովանդակությունը միմիայն հեղինակներինն է և պարտադիր չէ, որ արտահայտեն ԱՄՆ ՄԶԳ կամ ԱՄՆ կառավարության տեսակետները:

17:13 Հուլիս 26, 2019


էկոԱհազանգ

Թեժ կետեր


Մարզեր


Բաժանորդագրում

Subscribe to receive our latest news