Մեղրաձորում ապօրինաբար ոսկու կորզման ֆաբրիկա՞ է կառուցվում

Մեղրաձորում ապօրինաբար ոսկու կորզման ֆաբրիկա՞ է կառուցվում

ԷկոԼուր

«Մեղրաձորում, ըստ հավաստի, բայց ոչ պաշտոնական տվյալների, ապօրինաբար կառուցվում է ոսկու կորզման ֆաբրիկա, ինչպես գյուղացիներն են ասում, ոչ թե ցիանական, այլ կարբամիդային եղանակով` ոչ մեկի, ոչ էլ մյուսի թույլտվությունը չունենալով»,- այս մասին ահազանգում է «Էկոլոգիական ակադեմիա» ՀԿ-ի նախագահ Գրետա Գաբրիելյանը:

Հիշեցնենք, որ «Մեղրաձոր Գոլդ» ՍՊԸ-ն, որը շահագործում է Կոտայքի մարզում գտնվող Մեղրաձորի ոսկու հանքավայրը, մտադիր էր հանքաքարից ոսկու կորզման համար ցիանային ֆաբրիկա կառուցել Մեղրաձորի առողջարանային գոտում: Սակայն տեղի բնակչությունը  եւ բնապահպան հասարակայնությունը դեմ արտահայտվեց այդ նախագծին, որը մեծ ռիսկեր էր պարունակում մարդկանց առողջության եւ շրջակա միջավայրի համար: ՀՀ Բնապահպանության նախարարությունը նախագիծը հետ վերադարձրեց ընկերությանը լրամշակման: Իր հերթին «Մեղրաձոր Գոլդ» ընկերությունը ՀՀ բնապահպանության նախարարության բնապահպանական փորձաքննությանը ներկայացրեց ոսկու կորզման արտադրամասի փոփոխված նախագիծ, որի համաձայն` ոսկու կորզումը ցիանիդի փոխարեն պետք է իրականացվի թիոմիզանյութով:

Նշենք, որ ոսկու կորզման ֆաբրիկայի կառուցումը չի կարող օրինական լինել, քանի դեռ Բնաապահպանական փորձաքննությունը դրական եզրակացություն չի տվել նախագծին: Մինչդեռ այս փոփոխված նախագծի վերաբերյալ օրենքով սահմանված կարգով հասարակական լսում դեռ չի անցկացվել եւ Բնաապահպանական փորձաքննությունը որեւէ եզրակացություն չի տվել:

14:53 Հունիս 21, 2013


էկոԱհազանգ

Թեժ կետեր


Մարզեր


Բաժանորդագրում

Subscribe to receive our latest news