Ջերմուկցիներն անում են իրենց քայլը. մեծ ավտոերթ դեպի Երևան

Ջերմուկցիներն անում են իրենց քայլը. մեծ ավտոերթ դեպի Երևան

ԷկոԼուր

Ամուլսարի ոսկու հանքավայրի շահագործման դեմ պայքարող Վայոց ձորի մարզի Ջերմուկ քաղաքի բնակիչները սեպտեմբերի 14-ին պատրաստվում են մեծ ավտոերթ անցկացնել: Ավտոերթով ջերմուկցիները կշարժվեն դեպի Երևան և կմիանան Ազատության հրապարակում նախատեսված քայլերթին:

Հայտարարությունը ֆեյսբուք սոցիալական ցանցում տարածել է Ջերմուկի բնակիչ Շիրակ Բունիաթյանը:

«Սիրելի հայրենակիցներ, այսպիսով, Ամուլսարի պահապան ջերմուկցիները ևս անում են իրենց քայլը։

Սեպտեմբերի 14-ին Ջերմուկ առողջարանային քաղաքի բնակիչները մեծ ավտոերթով գնում են միանալու մայրաքաղաք Երևանում նախատեսվող մեծ քայլերթին` նվիրված Ամուլսարի փրկությանը։

Կոչ ենք անում միանալ այդ խաղաղ ակցիային, որն ուղղված է լինելու ոչ թե ընդդեմ Հայաստանի Հանրապետության, այլ հանուն ինքնիշխան և մաքուր Հայրենիքի։

Ամուլսարի պահապան ջերմուկցիները դեռ հեղափոխության առաջին օրվանից մասնակցել և աջակցել են այսօրվա կառավարությանը՝ հանձինս վարչապետ Նիկոլ Փաշինյանի։

Այսպիսով, մեր պայքարը ոչ թե ուղղված է ընդդեմ կառավարության, այլ հեղափոխության տրամաբանական շարունակությունն է։

Ամուլսարը հայրենիք է, ուստի հայրենիքի փրկության ճանապարհին մենք այլևս ետ քայլ չունենք։

Ավտոերթը կմեկնարկի Ջերմուկի տաքսիների կանգառ հրապարակից սեպտեմբերի 14-ին՝ ժամը 12։00-ին:

Մենք գնում ենք միանալու մեր հազարավոր քույրերին և եղբայրներին, ովքեր հայրենիքի կարևորության գիտակցումով դուրս են գալու խաղաղ քայլերթի՝ ի աջակցություն Ամուլսարի փրկության։

Բոլոր հայրենասեր և հայրենատեր մարդկանց մասնակցությունը անչափ կարևոր է ։
Ամուլսարը սար է մնալու և վերջ», - նշված է հայտարարության մեջ։

 

14:58 Սեպտեմբեր 13, 2019


էկոԱհազանգ

Թեժ կետեր


Մարզեր


Բաժանորդագրում

Subscribe to receive our latest news