ԷկոԼուր
Բողոքի ցույցերը Կոտայքի մարզում շարունակվում են: Առավոտից Գողթ գյուղի բնակիչները փակել են Գողթ-Երևան ավտոճանապարհը՝ պահանջելով չեղարկել Գեղարդալճի ինքնահոս ոռոգման համակարգի ծրագիրը: Ըստ ծրագրի՝ նախատեսվում է Գեղարդալճի ջրամբարից խողովակաշարի միջոցով ինքնահոս եղանակով ջուր մատակարարել Կոտայքի մարզի Ձորաղբյուր, Ողջաբերդ համայնքներին, Գեղադիր գյուղի մի մասին եւ «Ջրվեժ» անտառպուրակի հողերը:
Գողթեցիները պնդում են, որ ոռոգման համակարգն իրականում կառուցվում է որոշ մարդկանց շահերը սպասարկելու և նրանց հողատարածքները ոռոգելու համար, որոնք գտնվում են Լանջազատ գյուղին հարող հատվածում: Բնակիչները նշում են, որ Գողթ գյուղն ունի 730 հեկտար ոռոգելի տարածք, որից ոռոգվում է 550 հեկտարը: «էսօր՝ հունիսի 3-ի դրությամբ, մեր գյուղ ջուր չի հասել... Մարդը տարածք ունի, բայց չի կարողանում ջրի, մենակ սելավաջրերն են հասել, էն էլ հաշված մարդիկ են կարողացել ջրել», - նշեցին ցուցարարները:
Գողթեցիները նաև ասացին, որ ծրագրի վերաբերյալ հանրային լսումներ բնակիչների հետ չեն անցկացվել, բոլոր հարցերը լուծվել են գյուղապետարանի փակ դռների հետևում: Գողթի գյուղապետ Արտավազդ Հակոբյանը նույնպես ակցիայի վայրում էր: Ծրագրին գյուղապետը կողմ է, եկել էր համոզելու բնակիչներին բացել ճանապարհը: Այնտեղ էր նաև «Գողթ 1» և «Գողթ 2» ՓՀԷԿ-երը շահագործող «Ջաղացի ձոր» ՓԲԸ-ի, Գողթի ջերմոցային տնտեսության հիմնադիր Մարկոս Ղարիբյանը, ով նույնպես փորձում էր համոզել գյուղացիներին բացել ճանապարհը: Բոլոր փորձերն ավարտվում էին վիճաբանությամբ:
Գողթեցիներն իրենց պայքարը սկսել էին հարևան գյուղից՝ Գառնիից, երբ գառնեցիները բոյկոտում էին Քաղցրաշենի ինքնահոս ոռոգման համակարգի ծրագիրը: Հենց Գառնիում էլ վարչապետ Հովիկ Աբրահամյանը խոստացել էր Գողթի բնակիչներին քննարկումներ նշանակել Գեղարդալճի ծրագրի վերաբերյալ: «Էդ ժամանակ վարչապետն ասաց, որ ընդհանրապես տեղյակ չէ խնդրից և տեղեկանալուց հետո կնշանակվեն քննարկումներ, այնուհետև կշարժվեն ըստ այդ քննարկումների: Նույն րոպերին մեր մարզպետ Կարապետ Գուլոյանն ասաց, որ շինարարական աշխատանքները կդադարեցվեն, և երկուշաբթի օրվանից կսկսվեն քննարկումները: Սակայն շինարարական աշխատանքները երկու անգամ թափ առան, և մինչ օրս Գողթ համայնքի բնակիչների կողմից բարձրաձայնած խնդիրները նրանց հետ ոչ ոք չի քննարկել», - ասաց Գողթի բնակիչ Վահրամ Սեդրակյանը և շեշտեց. «Մենք պահանջում ենք հանել բոլոր տեսակի շինտեխնիկան, և եթե կան ծրագրեր, որոնց շուրջ պետք է կազմակերպվի քննարկում, թող գան, քննարկեն Գողթ համայնքի բնակիչների հետ: Եթե ոչ, մենք մինչև վերջ պահանջելու ենք չեղարկել այդ ծրագիրը»:
Գողթեցիներին են միացել նաև Գառնիի բնակիչները՝ պահանջով չեղարկել Քաղցրաշենի ինքնահոս ոռոգման համակարգի ծրագիրը, որն այժմ գտնվում է կասեցման փուլում:
Մանրամասները՝ ավելի ուշ ԷկոԼուրի տեսանյութում:
 |
 |
 |
 |
 |
 |
 |
 |
 |
 |
 |
 |
 |
 |
Հունիս 03, 2016 at 20:11