ԷկոԼուր
Մարտի 12-ին Երևանում կայացել է Հայկական ԱԷԿ-ի 2-րդ էներգաբլոկի շահագործման ժամկետի երկարաձգման նախագծի համատեղ համակարգող կոմիտեի 8-րդ նիստը` Հայաստանի էներգետիկ ենթակառուցվածքների և բնական պաշարների նախարարի պաշտոնակատար, նախարարի առաջին տեղակալ Գարեգին Բաղրամյանի և «Ռոսատոմ» պետական կորպորացիայի գլխավոր տնօրենի առաջին տեղակալ, զարգացման և միջազգային բիզնեսի գծով տնօրեն Կիրիլ Կոմարովի համանախագահությամբ:
Նիստին մասնակցել են ՀՀ էներգետիկ ենթակառուցվածքների և բնական պաշարների նախարարության, ՀՀ ԿԱ միջուկային անվտանգության կառավարման պետական կոմիտեի, «Հայկական ատոմային էլեկտրակայան» ՓԲԸ-ի, «Հայատոմ» ՓԲԸ-ի, «Ռոսատոմ» պետկորպորացիայի, ինչպես նաև «Ռուսատոմ Սերվիս» ընկերության, «Ռոսէներգոատոմ Կոնցեռն», «Տեխսնաբէքսպորտ» ընկերությունների ներկայացուցիչները։
Քննարկվել են 2019թ. գործողությունների ծրագիրը և մինչև 2021թ. միջոցառումների ծրագիրը, Հայկական ԱԷԿ-ի 2-րդ էներգաբլոկի շահագործման պայմանները՝ պլանային-կանխարգելիչ վերանորոգման աշխատանքներից հետո, ինչպես նաև ՀԱԷԿ-ի արդիականացման շրջանակում Հայաստանի և Ռուսաստանի միջև համագործակցության մասին Միջկառավարական համաձայնագրի գործողության ժամկետի երկարաձգման հարցը։ Կողմերը քննարկել են նաև օգտագործված միջուկային վառելիքի դուրսբերման և վերամշակման պիլոտային ծրագրի նախապատրաստման հարցը:
Անդրադարձ է եղել հումանիտար ոլորտում և ատոմային էներգետիկայի բնագավառում կադրերի պատրաստման ուղղությամբ Հայաստանի և Ռուսաստանի երկկողմ համագործակցությանը: Նշվել է, որ 2018թ. դեկտեմբերին մեկնարկել է Ռոսատոմի քվոտաներով բակալավրիատի, մագիստրատուրայի և ասպիրանտուրայի ծրագրերով Ռուսաստանի առաջատար տեխնիկական բուհերում սովորելու համար հայ ուսանողների ընտրությունը. 2019-2020 ուսումնական տարվա համար հայ ուսանողներին հատկացվել է 4 տեղ։
Հայաստանի ավագ դպրոցների աշակերտների միջև անցկացված մաթեմատիկայի և ֆիզիկայի ամենամյա օլիմպիադայի մրցանակակիրները արտոնություններ կստանան «Ռոսատոմ» պետական կորպորացիայի հիմնական բուհեր, մասնավորապես՝ ՌԴ Ազգային միջուկային հետազոտական համալսարան (ՄԻՖԻ) ընդունվելիս:
Ատոմային էներգետիկայի բնագավառում կրթության հանրայնացման նպատակով Հայաստանի ազգային պոլիտեխնիկական համալսարանում ռուս մասնագետների մասնակցությամբ պարբերաբար անցկացվում են կրթական միջոցառումներ, իսկ Հայաստանի ներկայացուցիչները մասնակցում են «Ռոսատոմ» պետկորպորացիայի աջակցությամբ անցկացվող հումանիտար և միջազգային մշակութային նախագծերին։
Այս մասին հայտնում է ՀՀ էներգետիկ ենթակառուցվածքների և բնական պաշարների նախարարությունը:
Մարտ 13, 2019 at 18:05