Կարբի եւ Օհանավան համայնքների ոռոգման համակարգի ուսումնասիրման նպատակով ստեղծված հանձնաժողովը կսկսի աշխատանքները

Կարբի եւ Օհանավան համայնքների ոռոգման համակարգի ուսումնասիրման նպատակով ստեղծված հանձնաժողովը կսկսի աշխատանքները

ԷկոԼուր

ՀՀ փոխվարչապետ, տարածքային կառավարման նախարար Արմեն Գեւորգյանի մոտ մարտի 7-ին քննարկել են  Արագածոտնի մարզի Կարբի եւ Օհանավան համայնքների ոռոգման համակարգի ուսումնասիրման նպատակով ստեղծված հանձնաժողովի աշխատանքների կազմակերպման հետ կապված հարցեր: Ինչպես տեղեկացնում է ՀՀ տարածքային կառավարման նախարարության հասարակայնության հետ կապերի բաժինը, հանձնաժողովը 10-օրյա ժամկետում պետք է ուսումնասիրի Կարբի եւ Օհանավան համայնքներում ոռոգման համակարգի փաստացի իրավիճակը, գնահատականներ ներկայացնի ներքին ցանցի եւ ջրի հասանելիության տեխնիկական վիճակի, հողօգտագործողների եւ ՋՕԸ-ի իրավահարաբերությունների, ոռոգման ջրի նվազագույն պահանջարկի եւ ոռոգման արագահոս համակարգի վերակառուցման նախագծի վերաբերյալ, ինչպես նաեւ բացահայտի հնարավոր խնդիրները, որոնք կարող են ի հայտ գալ առաջարկվող էներգետիկ ծրագրի իրականացման ընթացքում: Հանձնաժողովը ղեկավարում է ՀՀ տարածքային կառավարման նախարարի տեղակալ Արտաշես Բախշյանը: Հանձնաժողովի կազմում ընդգրկված են ՀՀ գյուղատնտեսության, բնապահպանության նախարարությունների, ջրային տնտեսության պետական կոմիտեի եւ Արագածոտնի մարզպետարանի ներկայացուցիչներ:

Հանձնաժողովի աշխատանքներում կներգրավվեն նաեւ ԱԺ պատգամավորներ, նշված համայնքների, հասարակական կազմակերպությունների ներկայացուցիչներ, տեղական եւ միջազգային փորձագետներ: Ուսումնասիրության արդյունքներն ու առաջարկությունները հանձնաժողովը կներկայացնի կառավարությանը:

Հիշեցնենք, որ «Գահա էներջի» ընկերությունը սկսել էր փոքր ՀԷԿ կառուցել Արագածոտնի մարզի Արզնի-Շամիրամ դոտացիոն ջրանցքի վրա, ինչը առաջացրել է Օհանավան եւ Կարբի գյուղերի բնակիչների դժգոհությունը: Ջրանցքը ապահովում է համայնքների ոռոգումը: Բնակիչները համոզված են, որ ՓՀԷԿ-ի կառուցումից հետո իրենց խնձորի այգիները չեն կարողանա ոռոգել: Նրանք դեմ են ՓՀԷԿ-ի կառուցմանը: Մարտի 6-ին ՀՀ Արագածոտնի մարզի 7 գյուղերի` Ուշիի, Օհանավանի, Կարբիի, Արտաշավանի, Սաղմոսավանի, Եղվարդի, Երզնկայի բնակիչները փակել էին Երևան-Ապարան ավտոճանապարհը:  Բնակիչները պահանջում էին դադարեցնել փոքր ՀԷԿ-ի կառուցումը: Արդյունքում ծանր տեխնիկան դուրս բերվեց շինհրապարակից:

Նշենք, որ «Գահա էներջի» ընկերության ՓՀԷԿ-ի կառուցման  նախագիծը բնապահպանական փորձաքննություն  չի անցել եւ դրական կամ բացասական եզրակացություն չի ստացել:

22:02 Մարտ 07, 2014


էկոԱհազանգ

Թեժ կետեր


Մարզեր


Բաժանորդագրում

Subscribe to receive our latest news