ԷկոԼուր
ԷկոԼուրը շարունակում է ներկայացնել Հայաստանի մետաղական հանքերը շահագործող ընկերությունների իրական սեփականատերերի վերաբերյալ հայտարարագրերը, որոնք հրապարակվել են Արդյունահանող ճյուղերի թափանցիկության նախաձեռնության շրջանակներում՝ ՀՀ արդարադատությաննախարարության իրավաբանական անձանց պետական ռեգիստրի գործակալության կայքում:
Այս հրապարակման մեջ կանդրադառնանք Լոռու մարզում Շամլուղի պղնձի հանքավայրը շահագործող «Ախթալայի Լեռնահարստացման Կոմբինատ» ՓԲԸ-ի հայտարարագրին:
Նախկին քաղաքական գործչի 100% սեփականությունը
«Ախթալայի Լեռնահարստացման Կոմբինատ» ՓԲԸ-ն գրանցվել է 2002 թ-ի հոկտեմբերի 26-ին: Հայտարարագրում բացահայտված է երկու իրական սեփականատեր, որոնցից մեկին պատկանում է ընկերության բաժնետոմսերի ամբողջ փաթեթը:
Խոսքն առաջին իրական սեփականատեր Վահե Հակոբյանի մասին է: Հայտարարագրում նշված տվյալներով պարզ է դառնում, որ նա Հայաստանի Հանրապետական կուսակցության անդամ, գործարար, նախկին պատգամավոր, Սյունիքի նախկին մարզպետ, Զանգեզուրի պղնձամոլիբդենային կոմբինատի նախկին տնօրեն Մաքսիմ Հակոբյանի որդին է: Վահե Հակոբյանին են պատկանում ընկերության 100 հատ բաժնետոմսերը՝ 100% մասնակցությամբ:
Ընկերության բաժնետոմսերի ամբողջ փաթեթը Վահե Հակոբյանը ձեռք է բերել 2019 թ-ի հուլիսի 10-ին, երբ Հայաստանում արդեն ներդրված էր ԱՃԹՆ գործընթացը: Վահե Հակոբյանը նաև ընկերության խորհրդի անդամ է, իրավասու է նշանակելու կամ ազատելու ընկերության կառավարման մարմիններում ընդգրկված անձանց:
Իսկ երկրորդ իրական սեփականատերն ընկերության գլխավոր տնօրեն Սամվել Խաչատրյանն է:
Հայտարարագրում բացահայտված է ընդամենը մեկ միջանկյալ ընկերություն՝ Հայաստանում գտնվող «ՄԱՍԿՕ ՄԱՅՆ» ՓԲԸ-ն, որը գործում է առաջին սեփականատեր Վահե Հակոբյանի համար: Ընկերությունը «Ախթալայի Լեռնահարստացման Կոմբինատ» ՓԲԸ-ի կանոնադրական կապիտալում ունի ուղղակի մասնակցություն:
Մայիս 25, 2020 at 11:27