Տեղի բնակիչների պահանջով Ճապոնիայում դատարանը վճռեց կանգնեցնել «Իկատա» ատոմակայանի ռեակտորի աշխատանքը

Տեղի բնակիչների պահանջով Ճապոնիայում դատարանը վճռեց կանգնեցնել «Իկատա» ատոմակայանի ռեակտորի աշխատանքը

ԷկոԼուր

Ճապոնիայում Հիրոսիմայի բարձրագույն դատարանը բավարարեց տեղի մի քանի բնակիչների հայցը և վճռեց կանգնեցնել Shikoku Electric Power-ի Էհիմե պրեֆեկտուրայում գործող «Իկատա» ատոմակայանի երրորդ ռեակտորի աշխատանքը, հաղորդում է ՏԱՍՍ գործակալությունը:

Հայցվորների պնդմամբ՝ հաստատված անվտանգության ստանդարտները հաշվի չեն առնում այն ռիսկերը, որոնք կարող են առաջանալ երկրաշարժերի և հրաբխային ժայթքումների ժամանակ: Խոսքը, մասնավորապես, ատոմակայանից 130 կմ հեռավորության վրա գտնվող «Ասո» հրաբխի հնարավոր ժայթքման մասին է:

Առաջին անգամ չէ, որ բնակիչները դատական հայց են ներկայացնում: Մինչ այս երկու անգամ դատարանը պաշտպանել է էներգետիկ ընկերությանը, որի ներկայացրած զեկույցի համաձայն` հրաբխի ուժեղ ժայթքման հավանականությունը շատ ցածր է:

«Իկատա»-ի երրորդ ռեակտորը վերսկսել էր աշխատանքը 2018 թ-ի հոկտեմբերին: Այս կայանը միակն է, որը գտնվում է Սիկոկուում՝ Ճապոնիայի չորս հիմնական կղզիներից ամենափոքրում: Ներկայում ռեակտորը կանգնեցված է ստուգումների անցկացման նպատակով: Սակայն դատարանի որոշման հետևանքով ապրիլին պլանավորված վերագործարկումն ընկերությունը ստիպված կլինի հետաձգել:

Մինչ 2011 թ-ին «Ֆուկուսիմա-1» ԱԷԿ-ի վթարը Ճապոնիայի էներգահաշվեկշռում ատոմակայաններին բաժին էր ընկնում մոտ 30%-ը: Ներկայում Ճապոնիայում գործում է ութ ռեակտոր՝ հինգ կայաններում, իսկ կառավարությունն ակնկալում է մոտ ապագայում շարունակել ատոմակայանների մասնակի վերագործարկման քաղաքականությունը:

17:15 Հունվար 17, 2020


էկոԱհազանգ

Թեժ կետեր


Մարզեր


Բաժանորդագրում

Subscribe to receive our latest news