Մետաղական հանքավայրերի իրական սեփականատերերի մասին ի՞նչ տվյալներ հասանելի կլինեն հանրությանը

ԷկոԼուր

Հայաստանում մետաղական հանքավայրերի ուսումնասիրության կամ շահագործման իրավունք ունեցող ընկերությունները մինչև փետրվարի 20-ը ՀՀ արդարադատության նախարարության իրավաբանական անձանց պետական ռեգիստր են ներկայացրել ընկերության իրական սեփականատերերի վերաբերյալ հայտարարագիրը:

Հայտարարագրով ներկայացված տեղեկատվությունը հրապարակվելու է պետական ռեգիստրի www.e-register.am կայքում՝ բացառությամբ ֆիզիկական անձանց անձը հաստատող փաստաթղթի տվյալների, այդ թվում՝ հանրային ծառայության համարանիշի, ինչպես նաև նրանց հաշվառման և բնակության հասցեների մասին տեղեկատվության:

Իրական սեփականատերերի վերաբերյալ հայտարարագրում ներառված՝ հրապարակման կամ տրամադրման ենթակա տվյալների ցանկը սահմանելու մասին որոշումը ՀՀ կառավարությունն ընդունեց ս.թ. մարտի 26-ին:

ՀՀ-ում իրական սեփականատերերի բացահայտման գործընթացն իրականացվում է Արդյունահանող ճյուղերի թափանցիկության նախաձեռնության շրջանակներում: ԱՃԹՆ-ն պահանջում է, որ իրական սեփականատերերի վերաբերյալ ամբողջական տվյալները առանց սահմանափակումների և անվճար հասանելի լինեն հանրությանը: Իրական սեփականատերերի հրապարակման ենթակա տվյալների ցանկը սահմանում է ՀՀ կառավարությունը:

Հրապարակվելուց հետո իրական սեփականատերերի վերաբերյալ տեղեկատվությունը հասանելի է լինելու հանրությանն անվճար՝ առանց պետական տուրքի վճարման պահանջի:

Նշենք, որ ս.թ. փետրվարի 12-ի դրությամբ իրական սեփականատիրոջ բացահայտման պարտականություն ունեն մետաղական օգտակար հանածոյի արդյունահանման իրավունք ունեցող 23 ընկերություն՝ նախկին 25-ի փոխարեն:

Դրանք են՝ «Զանգեզուրի պղնձամոլիբդենային կոմբինատ» ՓԲԸ-ն, «ՉԱԱՐԱՏ ԿԱՊԱՆ» ՓԲԸ-ն, «ԼԻԴԻԱՆ ԱՐՄԵՆԻԱ» ՓԲԸ-ն, «Թեղուտ» ՓԲԸ-ն, «Ագարակի ՊՄԿ» ՓԲԸ-ն, «ԳեոՊրո Մայնինգ Գոլդ» ՍՊԸ-ն, «Ախթալայի լեռնահարստացման կոմբինատ» ՓԲԸ-ն, «Թաթսթոուն» ՍՊԸ-ն, «ԼԻՃՔՎԱԶ» ՓԲԸ-ն, «Մեղրաձոր գոլդ» ՍՊԸ-ն, «Պարամաունտ Գոլդ Մայնինգ» ՓԲԸ-ն, «Սագամար» ՓԲԸ-ն, «Լեռ-էքս» ՍՊԸ-ն, «Ֆորչն Ռիզորսիս» ՍՊԸ-ն, «Մոլիբդենի աշխարհ» ՍՊԸ-ն, «Մեգո Գոլդ» ՍՊԸ-ն, «Մուլտի Գրուպ» Կոնցեռն ՍՊԸ-ն, «Վարդանի զարթոնքը» ՍՊԸ-ն, «Ասսաթ» ՍՊԸ-ն, «Մարջան Մայնինգ Քոմփանի» ՍՊԸ-ն, «Ակտիվ լեռնագործ» ՍՊԸ-ն, «ԱՏ-ՄԵՏԱԼՍ» ՍՊԸ-ն, «ԲԱԿՏԵԿ ԷԿՈ» ՍՊԸ-ն, «ԳԵՂԻ ԳՕԼԴ» ՍՊԸ-ն, «ՂԱՐԱԳՈՒԼՅԱՆՆԵՐ» ՓԲԸ-ն:

Նոր տվյալներով ցուցակից դուրս են մնացել «Մեգո Գոլդ» ՍՊԸ-ն և «Մարջան Մայնինգ Քոմփանի» ՍՊԸ-ն:

Իսկ մետաղական օգտակար հանածոյի արդյունահանման նպատակով երկրաբանական ուսումնասիրության իրավունք ունեցող 13 ընկերություն ունեն իրական սեփականատիրոջ բացահայտման պարտականություն: Դրանք են՝ «ԷՔՈՒԻՎԵՍՏ ԱԼԼԻԱՆՍ ՖԱՈՒՆԴԵՅՇՆ» ՍՊԸ-ն, «ԱՅՐՆ ՄԱՅՆԻՆԳ» ՍՊԸ-ն, «ՊՐԵՄԻՈՒՄ ՄԱՅՆԻՆԳ» ՍՊԸ-ն, «ԷՆԵՐԳՈ ԻՆՎԵՍՏ ՀՈԼԴԻՆԳ» ՓԲԸ-ն, «ԳՈԼԴԵՆ ԼԵՆԴ» ՍՊԸ-ն, «ՄԵՏԱԼՍ ՄԱՅՆԻՆԳ ԳՐՈՒՊ» ՍՊԸ-ն, «ՀԱՐՈՒՍՏ ՄԵՏԱՂ» ՍՊԸ-ն, «ԿԱՊՊԵՐ ՊԼԱՍ» ՍՊԸ-ն, «ՊՈԼԻՄԵՏԱԼ ԱՐՄԵՆԻԱ» ՍՊԸ-ն, «ՆԻԳ ՄԱՅՆԻՆԳ» ՍՊԸ-ն, «ԻՆՏԵՐ ՄԱՅՆԻՆԳ» ՍՊԸ-ն, «ՉՈՒԴՈ ՄԵՏԱԼ» ՍՊԸ-ն, «ԳԵՈՌԵՅԴ» ՓԲԸ-ն:

Իրական սեփականատեր հանդիսանալու հիմքերին ծանոթացեք այստեղ:

Մարտ 30, 2020 at 19:58