Վրաստանի Ռաչայի շրջանը չի զարգացնում իր զբոսաշրջային ենթակառուցվածքները «Օնի ՀԷԿ կասկադ» նախագծի պատճառով

Վրաստանի Ռաչայի շրջանը չի զարգացնում իր զբոսաշրջային ենթակառուցվածքները «Օնի ՀԷԿ կասկադ»  նախագծի պատճառով

ԷկոԼուր

Վրացական «Co Investment» հիմնադրամը և «Փերի» ՍՊԸ-ն ցանկանում են Վրաստանի հյուսիս արևմուտքում՝ Ռիոնի գետի վրա կառուցել «Օնի ՀէԿ» կասկադը՝ 206 Մվ նախագծային հզորությամբ և 766.7 ԳՎտժ տարեկան արտադրողականությամբ: Այս նախագծով նախատեսվում է Ռիոնի գետից ջրառն իրականացնել ընդհանուր 22 կմ երկարությամբ երկու դերիվացիոն թունելների միջոցով: Նախագծի ՇՄԱԳ-ը դեռ չի ստացել թույլտվություն:

Ռիոնի գետն արևմտյան Վրաստանի հիմնական գետն է, որը սկիզբ է առնում Մեծ Կովկասի լեռնաշղթայի լանջերից՝ Ռաչայի շրջանում և թափվում է Սև ծով, իսկ գետաբերանը գտնվում է Վրաստանի Փոթի քաղաքում:

Րիոնի գետ

«Օնի ՀէԿ» կասկադի ծրագրի ազդակիր գյուղերի բնակիչները դեմ են «Օնի ՀԷԿ» կասկադի կառուցմանը: 2018թ. բնակիչները ավելի քան 5000 ստորագրություն են հավաքել ընդդեմ կասկադի:
ԷկոԼուրն վրացական «Green Alternative» (Կանաչ այլընտրանք) ՀԿ-ի իր գործընկերների հետ այցելեց այն գյուղեր, որոնք ազդեցություն կկրեն ՀԷԿ-ի կասկադի կառուցման դեպքում՝ պարզելու ընթացիկ իրավիճակը և բնակիչների դիրքորոշումը:

Վրաստանի Ռաչա շրջանի Գլոլա գյուղի եկամուտը գյուղատնտեսությունն է և տուրիզմը: Այստեղ բնակիչները դեմ են «Օնի ՀԷԿ» կասկադի կառուցմանը, քանի որ համոզված են, որ ՀԷԿ-ը կսահմանափակի տարածաշրջանում տուրիզմի զարգացումը՝ ներառյալ իրենց գյուղում:

Գլոլա գյուղ

«Այստեղ ունենք պատմական հուշարձաններ, ամրոց, հին ժամանակների վանք, ունենք հանքային ջրեր, և չքնաղ բնություն: Տուրիզմն այստեղ զարգանալու է: Եթե «Օնի ՀէԿ» կասկադի նախագիծն իրականանա, Ռաչայի տարածաշրջանը կմահանա»,- ասացին Գլոլայի բնակիչները: Բնակիչները նաև նշեցին, որ «Օնի ՀէԿ» կասկադի նախագծի պատճառով ներդրողները մտափոխվել են և այլևս չեն ցանկանում գումար ներդրել հանգստյան տներ և տուրիստական այլ ենթակառուցվածքներ կառուցելու մեջ:


Ըստ Գլոլա գյուղի բնակիչ Դավիթ Բիչաշվիլիի, 2019թ. հունիսին տեղացիների հետ կազմակերպված հանրային հանդիպման ընթացում «Օնի ՀէԿ» կասկադի հեղինակները չեն կարողացել պատասխանել տեղի բնակիչների՝ էր «Օնի ՀէԿ» կասկադի ռիսկերին վերաբերող հարցերին:

Մեծ են ռիսկերը Ուցերա գյուղի համար. ՀԷԿ-ի կասկադի թունելն անցնելու է գյուղի վերևի մասով, այդ իսկ պատճառով բնակիչներն անհանգստանում են իրենց անվտանգության համար, քանի որ գյուղը գտնվում է սողանքային և սեյսմիկ գոտում, և ակտիվ երկրաբանական գործընթացների պատճառով, եթե ՀԷԿ-ի թունելը վնասվի, ապա ջուրը կավերի գյուղը:

Ուցերա գյուղ

Մեկ այլ ռիսկ է հանքային ջրերի աղբյուրների կորուստը. Ուցերա գյուղում կա հանքային ջրի 18 աղբյուր, և բնակիչները կարծում են, որ աղբյուրները կանհայտանան թունելի կառուցման դեպքում:

«Գյուղը գտնվում է սողանքային և սեյսմիկ գոտում, իսկ նրանք չեն գնահատել իրենց նախագծի ռիսկերը: Մեզ անհրաժեշտ է անկախ փորձագիտական գնահատում, որը ոչ ոք չի անցկացրել»,- ասաց երկրաբան, Ուցերա գյուղի բնակիչ Մանանա Մետրեվելին:

Ուցերայում կա մի քանի հյուրատուն, որոնց սեփականատերերն իրենց բիզնեսը կորցնելու ռիսկեր են տեսնում «Օնի ՀէԿ» կասկադի կառուցման դեպքում: «Տուրիստներն այստեղ չեն գա, եթե «Օնի ՀէԿ» կասկադը կառուցվի»,- ասաց հյուրատներից մեկի սեփականատերը:

«Օնի ՀԷԿ» կասակդի թունելն անցնելու է նաև Նիգավզեբի գյուղի վերևով: Այստեղի բնակիչները նույնպես դեմ են «Օնի ՀէԿ» կասկադի կառուցմանը: Դեմ լինելու հիմնական պատճառներն են միկրոկլիմայի փոփոխությունը, երկրաշարժերի պատճառով թունելի վթարները, ջրի և գյուղատնտեսությամբ զբաղվելու կորստի հավանականությունը: Բնակիչները պատմեցին, որ իրենք հարցուփորձ են արել Սվանեթիի և Կազբեգի շրջաննների բնակիչներին այնտեղ գործող ՀԷԿ-երի ազդեցության մասին, և ոչ մեկ խորհուրդ չի տվել ՀԷԿ ունենալ իրենց բնակավայրում:

Նիգավզեբի գյուղ

«Օնի ՀԷԿ» կասակդի թունելն անցնելու է Խուրութի գյուղի ստորին հատվածով: Գյուղացիների համաձայն՝ ոչ ոք չի տեղեկացրել իրենց «Օնի ՀէԿ» կասկադի կառուցման և դրա ռիսկերի մասին, միայն երկու տղամարդ այցելել են իրենց գյուղը՝ սողանքային տարածքը տեսնելու համար: Բնակիչները դեմ են ՀԷԿ-ի կառուցմանը՝ նշելով, որ թունելի կառուցումը կակտիվացնի սողանքային գործընթացները, որոնք արդեն իսկ վնասել են մի քանի տուն: Ըստ բնակիչների, Խուրութիում անհրաժեշտ է զարգացնել տուրիզմը և ոչ թե ՀԷԿ-երը:

Խուրութի գյուղ

Սողանքից փլվող տուն Խուրութիում

Այցելած բոլոր գյուղերն ապրում են վատ պայմաններում. տներում չկան խմելու ջուր, կոյուղի, չկան խանութներ և դեղատներ, չկա աշխատանք, տուրիստական ենթակառուցվածքներ և լավ կենցաղային պայմաններ: Ըստ բնակիչների, Ռաչայի տեղական ինքնակառավարման մարմինը խոստանում է լավ կենցաղային պայմաններ ՀԷԿ-ի կառուցման դեպքում, բայց իրենք նախընտրում են բնությունը, և ոչ թե «Օնի ՀէԿ» կասկադը:

18:19 Օգոստոս 05, 2019


էկոԱհազանգ

Թեժ կետեր


Մարզեր


Բաժանորդագրում

Subscribe to receive our latest news