ԷկոԼուր
43 օր ամբողջությամբ ջրազրկված Երևան քաղաքի Վերին Շենգավիթ 11 փողոցի խնդիրը վերջապես լուծվեց, բնակիչները ջուր ունեցան: Հիշեցնենք, որ օգոստոսի 14-ից Վերին Շենգավիթ 11 փողոցը ամբողջությամբ ջրազրկված էր: Բնակիչները պատմել էին, որ «Երևան Ջուրը» Մանթաշյանում նոր ջրագիծ անցկացնելով, հինը չէր միացրել ջրագծին։ Ամիս ու կես ջուր չունենալու արդյունքում փողոցում ստեղծվել էր հակահիգիենիկ վիճակ: «Շաբաթ օրը՝ սեպտեմբերի 27-ին, ամբողջ փողոցի ջուրը միացրել են, և իրավիճակը արդեն կարգավորվում է: Ընդհանուր առմամբ, շինարարական աշխատանքները տևեցին 25 օր: Սկզբնական շրջանում անգործություն էր, սակայն Տարոն Մարգարյանին ուղղված բաց նամակից հետո նրանք ակտիվացան», - ԷկոԼուրի հետ զրույցում ասաց տեղի բնակիչ Անահիտ Խրոյանը՝ նշելով, որ եթե աշխատանքները հենց սկզբնական շրջանում տարվեին նման ակտիվ կերպով, մարդիկ այդքան չէին տառապի, հարցն էլ վաղուց լուծված կլիներ:
Նշենք, որ նոր ջրագծի անցկացման շինարարական աշխատանքների իրականացման համար ծախսերը հոգացել են բնակիչները, իսկ աշխատանքային բրիգադը ապահովել է «Երևան Ջուր» ՓԲԸ-ն:
Այս պահին միակ խնդիրը քանդված փողոցն է, սակայն, բնակիչների խոսքով, Շենգավիթի վարչական շրջանի ղեկավար Արմեն Սարգսյանը խոստացել է, որ հաջորդ շաբաթվա ընթացքում ասվալտապատման աշխատանքներն անպայման կկատարեն:
Սեպտեմբեր 30, 2014 at 17:02