Միջնորդություն դատարանին՝ որպես հայցի ապահովման միջոց արգելել «Լիդիան Արմենիա» ընկերությանը որևէ գործունեություն իրականացնել Ամուլսարում

Միջնորդություն դատարանին՝ որպես հայցի ապահովման միջոց արգելել «Լիդիան Արմենիա» ընկերությանը որևէ գործունեություն իրականացնել Ամուլսարում

ԷկոԼուր

Սեպտեմբերի 30-ին Ջերմուկի բնակիչների փաստաբան Նազելի Վարդանյանը միջնորդություն ներկայացրեց ՀՀ վարչական դատարան` որպես հայցի ապահովման միջոց արգելելու «Լիդիան Արմենիա» ընկերությանը որևէ գործունեություն իրականացնել Ամուլսարում մինչև կենսաբազմազանության վրա ազդեցության գնահատաման նոր փորձաքննություն իրականացնելը: 

Ջերմուկի 18 բնակիչ դատարանից պահանջում են անվավեր ճանաչել Ամուլսարի ծրագրի ՇՄԱԳ փաստաթուղթը: Նիստի ժամանակ փաստաբան Նազելի Վարդանյանը դատարանին ներկայացրեց «ELLARD»-ի ուսումնասիրության մեջ նշված այն գործոնները, որոնք հաշվի չեն առնվել փորձաքննական ՇՄԱԳ-ի և եզրակացության մեջ, Շրջակա միջավայրի նախարար Էրիկ Գրիգորյանի կողմից ՀՀ կառավարությանն ուղղված 13 կետից բաղկացած գրությունը, որտեղ նշված է, թե ինչ նոր հանգամանքներ կան, որոնք փորձաքննության չեն ենթարկվել:

 

Նազելի Վարդանյանի ներկայացմամբ, այդ փաստաթղթերը պատասխանող կողմին ուղարկվել էին սեպտեմբերի 25-ին: ՀՀ Շրջակա միջավայրի նախարարության «Շրջակա միջավայրի վրա ազդեցության փորձաքննական կենտրոն» ՊՈԱԿ-ի ներկայացուցիչ Զարուհի Զուռնաչյանը դատարանին հայտնեց, որ դեռևս որևէ նոր փաստաթուղթ չի ստացել: Նախարարության ներկայացուցիչներ Երվանդ Մուրադյանն ու Խաչատուր Խաչատրյանն էլ հայտնեցին, որ այդ փաստաթղթերը ստացել են մի քանի օր առաջ և դեռ լիարժեք ծանոթ չեն դրանց: Իսկ «Լիդիան Արմենիա» ընկերության ներկայացուցիչ Սայաթ Բադալյանն ասաց, որ փաստաթուղթը փոստից ստացել է դատական նիստը սկսելուց մի քանի ժամ առաջ: Նրանք դատարանից ժամանակ խնդրեցին նյութերին ծանոթանալու համար: Դատական նիստը հետաձգվեց: Հաջորդ նիստը նշանակվեց հոկտեմբերի 17-ին: 

22:03 Սեպտեմբեր 30, 2019


էկոԱհազանգ

Թեժ կետեր


Մարզեր


Բաժանորդագրում

Subscribe to receive our latest news