Նազելի Վարդանյան. «Ես միտում եմ տեսնում, որ հայցվորը, հավանաբար, նպատակ ուներ, որ նիստերն անցնեին իմ բացակայությամբ»

Նազելի Վարդանյան. «Ես միտում եմ տեսնում, որ հայցվորը, հավանաբար, նպատակ ուներ, որ նիստերն անցնեին իմ բացակայությամբ»

ԷկոԼուր

Դեկտեմբերի 12-ին Երևան քաղաքի առաջին ատյանի ընդհանուր իրավասության դատարանում տեղի ունեցավ ՀՀ վարչապետի որոշմամբ ստեղծված աշխատանքային խմբի անդամ, փաստաբան Նազելի Վարդանյանի դեմ «Լիդիան Արմենիա» ՓԲԸ-ի հայցի վերաբերյալ նիստը: ԷկոԼուրի հետ զրույցում Նազելի Վարդանյանն ասաց, որ միջնորդություն է ներկայացրել դատարան նախնական դատական նիստի վերսկսման համար, որպեսզի հնարավորություն ունենա ապացույցներ ներկայացնելու և իր իրավունքները պաշտպանելու: Դատարանը չի անդրադարձել միջնորդությանը:

Միջնորդությունը պայմանավորված է նրանով, որ Նազելի Վարդանյանը չի ծանուցվել դատական նիստերի մասին, մինչդեռ դատական գործը մտել է դատաքննության փուլ:

Դատական նիստերի մասին Նազելի Վարդանյանի ծանուցում չստանալը պայմանավորված է նրանով, որ հայցվորը՝ «Լիդիան Արմենիա» ընկերությունը, դատարան ներկայացրած փաստաթղթերում նշել է Նազելի Վարդանյանի սխալ հասցե:

«Իրենք իմ հասցեն շատ լավ գիտեն, քանի որ մեկ այլ դատական գործով ես իրենց հետ նամակագրության մեջ եմ եղել: Այս գործով ոչ մի փաստաթուղթ ինձ չի հասել: Ես միտում եմ տեսնում, որ հայցվորը, հավանաբար, նպատակ ուներ, որ նիստերն անցնեին իմ բացակայությամբ»,- ասաց Նազելի Վարդանյանը:

Հիշեցնենք, որ «Լիդիան Արմենիա» ընկերությունը դատարանից պահանջում է պարտավորեցնել Նազելի Վարդանյանին հրապարակայնորեն հերքել «Ինչու Ջերմուկ հիմնադրամին գումար է փոխանցում 80 մլն, երբ որ Ջերմուկը ազդակիր համայնք չէ.., ի՞նչ է դա նշանակում… դա կաշառքի մի ձև՞ է, ուրիշ տարբերակ չկա՞...» արտահայտությունը, որը Նազելի Վարդանյանն արել է 2018թ-ի նոյեմբերի 29-ին տեղի ունեցած ՀՀ վարչապետի 20.07.2018 թվականի թիվ 986-Ա որոշման հիման վրա ստեղծված Հայաստանի Հանրապետությունում միջազգային չափանիշներին համապատասխանող` հաշվետու հանքաարդյունաբերական քաղաքականության ներդրմանն ու իրագործմանն աջակցող աշխատանքային խմբի անդամների մամուլի ասուլիսի ընթացքում: Ընկերությունն այդ արտահայտությունը համարում է զրպարտություն և պահանջում է նաև Նազելի Վարդանյանից հօգուտ «Լիդիան Արմենիա» ՓԲԸ-ի բռնագանձել 1.000.000 ՀՀ դրամ, որպես փոխհատուցման գումար, ինչպես նաև լուծել դատական ծախսերի հարցը:

Սույն գործով հաջորդ դատական նիստը նշանակվել է 2020թ-ի փետրվարի 20-ին:

15:32 Դեկտեմբեր 12, 2019


էկոԱհազանգ

Թեժ կետեր


Մարզեր


Բաժանորդագրում

Subscribe to receive our latest news